Qafqaz silahlarında Şərqdə silah düzəldən ustaların çoxəsrlik təcrübəsi öz əksini tapıb. Üstəlik bu silahlar Qafqaz xalqlarının ənənələrine uyğun şəkildə zənginləşdirilib. Ornamentinin rəngarəngliyi və müxtəlifliyi baxımından diqqəti cəlb edən Qafqaz silahları özlüyündə Şərqin mədəniyyət tarixində qeyri-adi hadisə hesab olunur.
Qafqazda silahları bəzəmək üçün daha çox gümüşdən istifadə olunurdu. Bir çox xəncər qəbzəsi böyük ustalıqla gümüşdən düzəldilmiş, üzərində döymə işləri aparılmışdır. Qafqaz tapançaları və çaxmaqdaşlı tüfənglər sadə istehsal texnologiyasına baxmayaraq, yüksək döyüş keyfiyyəti ilə fərqlənirdi. XVII əsrdən istəhsal olunmağa başlayan odlu silahlar artıq XVIII əsrin sonunda yüksək səviyyəyə çatmış və Şərqdə geniş şöhrət tapmışdır.
Qafqazda düzəldilən odlu silahlar bəzək elementləri ilə də diqqəti cəlb edirdi. Belə ki, silahın lüləsi qızılla bəzədilir, sürgüsü çinar və qöz ağacından hazırlanır, habelə sümükdən, gümüşden naxış vurulurdu. Silahı düzəldən ustanın və onun sahibinin adının incəliklə yazılışı xarici görünüşünə xüsusi gözəllik verirdi. Orta əsr Qafqaz doyüşlərinin silahları və qoruyucu geyimləri - xəncərlər, qılınclar, dəbilqələr, qalxanlar, nigablar və s. diqqəti cəlb edir. Həmin silahlar ya başqa ölkələrdən gətirilir, ya da Qafqazda hazırlanırdı.